28 December 2012

دل کا دروازہ

کسی مصور سے لوگوں نے کہا کہ آپ دل کے دروازے کی تصویر بنائیں۔ دوسرے دن لوگوں نے دیکھا کہ مصور نے ایک خوبصورت دل کا دروازہ بنایا تھا۔ تصویر دیکھنے کے بعد لوگوں نے مصور سے کہا کہ تیری تصویر ویسے تو بہت خوبصورت ہے لیکن اس میں دو خامیاں ہیں۔ پہلی یہ کہ دل کا دروازہ "بند" کیوں ہے؟
دوسری یہ کہ دل کے دروازے میں "کنڈی" کیوں نہیں ہے؟
مصور نے جواب دیتے ہوئے کہا کیونکہ دل کا دروازہ ہر کسی کے لیے نہیں کھلتا اور اس میں کنڈی ہے جو باہر سے نہیں، اندر کی طرف سے لگی ہوئی ہے۔ اسی لیے جو دل کو بھا جائے، دروازہ صرف اسی کے لیے کھلتا ہے۔

18 December 2012

دوستی

دوستی ایک پاکیزہ رشتہ ہے۔ دوستی کی لاج رکھنا اتنا مشکل ہے جتنا کسی طوفان کو روکنا۔ دوستی انسان کے غم میں کمی کرتی ہے۔ اسے حوصلہ ملتا ہے۔ پھول بہت حسین ہوتے ہیں لیکن ایک دن مرجھا جاتے ہیں پر سچی اور بے غرض دوستی اس پھول کی طرح ہے جو کبھی مرجھا نہیں جاتا۔ سچی دوستی وہ ہے جو بااصول اور بے غرض ہوں اور سچا دوست وہ ہے جو کبھی دعوٰی نہ کرے بلکہ دوست کے لیے کرکے دکھائے۔ سچا اور بے غرض دوست کا ملنا اتنا مشکل ہے جتنا سمندر سے قیمتی موتی ڈھونڈ کر نکالنا۔ خوش نصیب ہے وہ، جس کا کوئی سچا دوست ہو۔

15 December 2012

وفا بے وفا

یہ تو سبھی جانتے ہیں کہ محبت کی نہیں جاتی بلکہ ہو جاتی ہے لیکن کچھ لوگ ایسے ہوتے ہیں جو صرف وقت گزارنے کے لیے محبت کرتے ہیں۔ ایسے لوگوں کی فطرت ہی بے وفائی کرنا ہوتئ ہے۔ ایسے لوگ دوسروں کے جذبات مجروح کرکے بڑی آسانی سے کہہ دیتے ہیں، "ہمیں بھول جانے کی کوشش کیجیئے۔"
یہ کہنا تو بہت آسان ہے لیکن ایسا ہونا بہت مشکل بلکہ کبھی کبھار نا ممکن ہے۔

13 December 2012

سمجھنے کی بات

آپ کو جتنے آنسو بہانے ہوں، جتنی سسکیاں بھرنی ہوں، جتنے بھی زخم دیکھنے، کھرچنے یا پھر سے ہرے کرنے ہوں تو یہ سب رات کی تاریکی میں کیجئے۔ صبح کا سورج اور آپ کے ہونٹوں کا تبسم، ایک ساتھ طلوع ہونے چاہیں کیونکہ دن روشنی کے لیے ہوتا ہے، اس لیے روشن دن میں تاریکیوں کے سائے آپ کے آس پاس نہیں لہرانے چاہیے۔

03 December 2012

جدائی

جس طرح آسمان پر چاند اور سورج ایک ساتھ ساتھ ہوتے ہوئے بھی ایک دوسرے سے جدا ہوتے ہیں، بالکل اسی طرح کبھی کبھار دو انسان جب ایک دوسرے کے قریب ہونے کے باوجود بھی ایک دوسرے سے دور ہوں تو یہ جدائی دکھ کا پہاڑ بن جاتی ہے۔
جدائی ایک چھوٹا سا لفظ ہے لیکن اس میں غم کا سمندر چھپا ہوتا ہے جو بظاہر تو پرسکون لگتا ہے لیکن اندر سے ایک بپھرا ہوا طوفان ہوتا ہے۔ جدائی موت کا دوسرا نام ہے۔ چاہنے والوں کی جدائی انسان کو زندہ مار دیتی ہے اور یہ ایک ناقابل برداشت درد ثابت ہوتا ہے۔

یادیں

یادیں بھی کتنی ظالم ہوتی ہیں۔ دل کی گہرائیوں سے کھرچنے کی کوشش کرو تو درد کی خراشیں پڑ جاتی ہیں۔ یادیں چاند کی نہ مٹنے والی داغوں کی طرح ہیں جو سدا نمایاں رہتے ہیں۔
زندگی بیت جاتی ہے لیکن زندگی کی راہ گزر پر بیتا ہوا کوئی نہ کوئی لمحہ صدیوں پر بھی بھاری ہوتا ہے۔ پانے کی خواہش تو ایک لمحے کی ہوتی ہے لیکن پا کر کھو دینے کا غم جان لیوا ثابت ہوتا ہے، ہر غم اسی طرح تازہ رہتا ہے جیسے کل ہی کی بات ہو۔

01 December 2012

زندگی

زندگی اس جزیرے کی مانند ہے جہاں پہ خوابوں اور عذابوں کے بہت سے درخت ہوتے ہیں، اگر دھوپ لگے تو سایہ نہیں دیتے اور پیاس لگے تو پھل دور ہوتا ہے۔ زندگی نہ جانے کس کس کا انتظار کرتی ہے اور موت بن بلائے مہمان کی طرح اچانک آ جاتی ہے۔ دولت کمانا بہت آسان ہے مگر اپنی محبت حاصل کرنا بہت ہی مشکل ہے۔ پل دو پل کی زندگی میں اگر کسی کا انتظار شامل ہو جائے تو یہ پل کبھی نہیں گزرتے اور صرف امید ہی زندگی کو جوڑے رکھتی ہے۔