خواب مرتے نہیں

خواب مرتے نہیں

خواب دل ہیں، نہ آنکھیں، نہ سانسیں، کہ جو

ریزہ ریزہ ہوئے تو بکھر جائیں گے

جسم کے موت سے بھی یہ نہ مر جائیں گے

خواب مرتے نہیں

خواب تو روشنی ہیں

نوا ہیں

ہوا ہیں

جو کالے پہاڑوں سے رکتے نہیں

ظلم کے دوزخوں سے بھی پھکتے نہیں

روشنی اور نوا اور ہوا کے عَلم

مقتلوں میں پہنچ کر بھی جھکتے نہیں

خواب تو حرف ہیں

خواب تو نور ہیں

خواب تو منصور ہیں

خواب مرتے نہیں

دوستی

دوستی ختم نہیں ہو سکتی

دوستی حب خدا ہوتی ہے
دوستی دست دعا ہوتی ہے
دوستی حرف وفا ہوتی ہے
دوستی سب سے جدا ہوتی ہے

دوستی سارے زمانے سے کہاں
دوستی ہاتھ ملانے سے کہاں
دوستی صرف جتانے سے کہاں

یہ تو روحوں کا ملن ہوتی ہے
یہ تو خوشبوئے چمن ہوتی ہے
اپنی دھن میں مگن ہوتی ہے
یہ تو بس اک لگن ہوتی ہے

دوستی، دوستو کیا ہوتی ہے
دوستی حق کی عطا ہوتی ہے
دوستی خوشبو ہوا ہوتی ہے
دوستی حد سے سوا ہوتی ہے

دوستی دوست اگر رکھتے ہیں
دور رہ کر بھی خبر رکھتے ہیں
دوست جینے کا ہنر رکھتے ہیں

دوستی چاند ستاروں کی طرح
دوستی دل کے سہاروں کی طرح
دوستی درد کے ماروں کی طرح
دوستی جھیل کناروں کی طرح

جو جدا ہو کے بسر کرتے ہیں
عمر بھر ساتھ سفر کرتے ہیں

دوستی سود و زیاں سے بڑھ کر
دوستی فہم و گماں سے بڑھ کر
دوستی ہے دل و جاں سے بڑھ کر
دوستی سارے جہاں سے بڑھ کر

دور رہ کر بھی کوئی پاس لگے
دوستی جینے کا احساس لگے

دوستی ختم نہیں ہو سکتی!

دل کا دروازہ

کسی مصور سے لوگوں نے کہا کہ آپ دل کے دروازے کی تصویر بنائیں۔ دوسرے دن لوگوں نے دیکھا کہ مصور نے ایک خوبصورت دل کا دروازہ بنایا تھا۔ تصویر دیکھنے کے بعد لوگوں نے مصور سے کہا کہ تیری تصویر ویسے تو بہت خوبصورت ہے لیکن اس میں دو خامیاں ہیں۔ پہلی یہ کہ دل کا دروازہ "بند" کیوں ہے؟
دوسری یہ کہ دل کے دروازے میں "کنڈی" کیوں نہیں ہے؟
مصور نے جواب دیتے ہوئے کہا کیونکہ دل کا دروازہ ہر کسی کے لیے نہیں کھلتا اور اس میں کنڈی ہے جو باہر سے نہیں، اندر کی طرف سے لگی ہوئی ہے۔ اسی لیے جو دل کو بھا جائے، دروازہ صرف اسی کے لیے کھلتا ہے۔

دوستی

دوستی ایک پاکیزہ رشتہ ہے۔ دوستی کی لاج رکھنا اتنا مشکل ہے جتنا کسی طوفان کو روکنا۔ دوستی انسان کے غم میں کمی کرتی ہے۔ اسے حوصلہ ملتا ہے۔ پھول بہت حسین ہوتے ہیں لیکن ایک دن مرجھا جاتے ہیں پر سچی اور بے غرض دوستی اس پھول کی طرح ہے جو کبھی مرجھا نہیں جاتا۔ سچی دوستی وہ ہے جو بااصول اور بے غرض ہوں اور سچا دوست وہ ہے جو کبھی دعوٰی نہ کرے بلکہ دوست کے لیے کرکے دکھائے۔ سچا اور بے غرض دوست کا ملنا اتنا مشکل ہے جتنا سمندر سے قیمتی موتی ڈھونڈ کر نکالنا۔ خوش نصیب ہے وہ، جس کا کوئی سچا دوست ہو۔

وفا بے وفا

یہ تو سبھی جانتے ہیں کہ محبت کی نہیں جاتی بلکہ ہو جاتی ہے لیکن کچھ لوگ ایسے ہوتے ہیں جو صرف وقت گزارنے کے لیے محبت کرتے ہیں۔ ایسے لوگوں کی فطرت ہی بے وفائی کرنا ہوتئ ہے۔ ایسے لوگ دوسروں کے جذبات مجروح کرکے بڑی آسانی سے کہہ دیتے ہیں، "ہمیں بھول جانے کی کوشش کیجیئے۔"
یہ کہنا تو بہت آسان ہے لیکن ایسا ہونا بہت مشکل بلکہ کبھی کبھار نا ممکن ہے۔

سمجھنے کی بات

آپ کو جتنے آنسو بہانے ہوں، جتنی سسکیاں بھرنی ہوں، جتنے بھی زخم دیکھنے، کھرچنے یا پھر سے ہرے کرنے ہوں تو یہ سب رات کی تاریکی میں کیجئے۔ صبح کا سورج اور آپ کے ہونٹوں کا تبسم، ایک ساتھ طلوع ہونے چاہیں کیونکہ دن روشنی کے لیے ہوتا ہے، اس لیے روشن دن میں تاریکیوں کے سائے آپ کے آس پاس نہیں لہرانے چاہیے۔

جدائی

جس طرح آسمان پر چاند اور سورج ایک ساتھ ساتھ ہوتے ہوئے بھی ایک دوسرے سے جدا ہوتے ہیں، بالکل اسی طرح کبھی کبھار دو انسان جب ایک دوسرے کے قریب ہونے کے باوجود بھی ایک دوسرے سے دور ہوں تو یہ جدائی دکھ کا پہاڑ بن جاتی ہے۔
جدائی ایک چھوٹا سا لفظ ہے لیکن اس میں غم کا سمندر چھپا ہوتا ہے جو بظاہر تو پرسکون لگتا ہے لیکن اندر سے ایک بپھرا ہوا طوفان ہوتا ہے۔ جدائی موت کا دوسرا نام ہے۔ چاہنے والوں کی جدائی انسان کو زندہ مار دیتی ہے اور یہ ایک ناقابل برداشت درد ثابت ہوتا ہے۔